Запрашаем на экскурсію па часовай экспазіцыі “1945. Не канец, не пачатак” на беларускай мове.

Падчас наведвання выставы мы засяродзімся на досведзе польскіх яўрэяў пасля Халакосту ў першыя пасляваенныя гады. Па выставе нас правядуць яўрэйкі і яўрэі, якія выжылі ў сховішчах або ў лагерах на тэрыторыі Польшчы, а таксама тыя, хто апынуліся на тэрыторыі СССР і Германіі. 

Большасць з іх засталася без сям’і і дому. Мы пабачым, як выглядала іх жыццё адразу пасля вайны. Паспрабуем адказаць на пытанне, якія яны мелі магчымасці для стварэння жыцця нанова, што яны адчувалі, у якім псіхалагічным і фізічным стане яны знаходзіліся. Якія наступствы прынёс Халакост не толькі на індывідуальным, але і на глабальным узроўні? Таксама мы даведаемся, як іншыя меншасці спрабавалі нанова будаваць сваё жыццё ў Польшчы.